الانتداب التاريخي !!




بعد سنين من العمل وتنوع الوظايف ..


الحمدلله ارتحت بوظيفتي الحالية وحبيتها ..



عارف اني ازعجتكم بوظيفتي اللي ماتدرون وش هي !!



راح أقولكم



أنا أخصائي حقوق وعلاقات المرضى



والوظيفة بإختصار تثقيف المرضى بحقوقهم ومساعدتهم في الحصول عليها كامله


واستقبال شكاوى المرضى وحلها


واستقبال ملاحظاتهم واقتراحاتهم والعمل فيها ورفعها لادارة المستشفى او المديرية أو الوزارة ..




اليومين هذي عندي دورة تدريبية في الدمام



طبعا بقايا ملكع <<<< يعني راعي استهبال


علشان كذا حضرت الساعة 10 بدل من 8 <<< ماصدق يرتاح من بصمة الدوام ..



دخلت المحاضرة وكان المحاضر مستشار الوزير


رجل محترم ومتواضع بكل امانه ..


بعد المحاضرة فتح مجال للنقاش



وياليته ماسواها بدأ الموظفين يشتكون انا ماأخذت حقي وأنا ناقصني وأنا إدارتي ماسوت لي وأنا وأنا وأنا ..



عصبت إحنا المفروض نتناقش عن مشاكل المرضى وإذا الموظفين مو عارفين يحلون مشاكلهم أجل وش حال مرضاهم ..!!



وعلى غير العادة قررت أشارك ورفعت يدي ..



أنا من الناس اللي يجي آخر واحد ويمشي آول واحد


ومن الناس اللي تسمع وبس ..



لكن رفعت يدي مرتين وثلاث وما عطاني وجه !!



والله ما أخليك ..



انتهت المحاضرة وبدت الناس تتسابق على الفطور وأنا منتظر


لما شفت المستشار بدى يرتب شنطته رحت له ..




وقلت له يادكتور أنا أشتغل بمستشفى بالرياض وعندي نقطتين بخصوص مشكلات المرضى حاب أناقشها معك ..<< << مدري من وين طلع هالاسلوب !!



المهم قال انت بالرياض مايحتاج نتناقش هنا تعال لي المكتب بالوزارة ..!!


سألته طيب متى ؟؟


بأي وقت مكتبي مفتوح لك ..



ههه حسيت إني أكثر واحد استفاد من حضور مستشار الوزير وش أبغى أكثر وأنا صار عندي موعد معه ..





بدت المحاضرة الثانية


وكان مساعد المستشار ما أعطانا محاضرة كل اللي سواه انه جلس يسمع شكوى الموظفين ..



عصبت من أسئلتهم الغريبة أو بصراحة الغبية


رفعت يدي مرتين وثلاث واخيرا عطاني وجه


سألته سؤال ... حسيته توهق



جاوبني وانا اعقد الموضوع واعقد السؤال أكثر ؟؟ ليه << علشان يحفظني ويعرف ثمن رفع يدي أكثر من مرة .. ههه بقايا وحش



بعد ماخلص المحاضرة رحت له أو نشبت له


وقلت له أنا اشتغل بمستشفى بالرياض وووسألته كم سؤال


ابتسم وقال " مثل ماقالك المستشار انت بالرياض تعال مكتبي بالوزارة <<< ههههه يازين النشبة كل الوزارة بيصيرون أصدقاي ..



قلت له لازم أتواصل معك ممكن تعطيني ايميلك ..


واعطاني اياه ..


ومن بين كل الحضور أكسب المهم والأهم للمرة الثانية على التوالي ..




بعدها رحنا نتغدى وتعرفت على مدراء من حايل وجيزان ونجران وعسير والباقي بالطريق ..




حتى منسق الوزارة ماسلم مني !!


نشبت له بالشهادة مع ا نا حنا بأول يوم ..


بالأخير إستسلم وقال انت بالرياض بجيب الشهاده لعندك << هههه ياوحش





طبعاً كل اللي فوق من نشبات وأسئلة وتعرفات ماهي من طبعي أساساً



ولكن سبحانه يغير ولا يتغير ..



بعدها نزلت للاستقبال واستلمت غرفتي بالفندق



ساعتها قلت سبحان الله




قبل هذي الوظيفة كنت أشتغل مسئول شؤون الموظفين


كانوا المهندسين والمدراء يطلعون انتدابات ويسافرون وكل شي على حساب الدولة هذا غير اللي يستلمونه بعد مايرجعون ..


وأنا كنت بمكتبي أسجل إنتداباتهم وأرفعها لهم علشان يستلمون حقوقهم ..



ماكنت أحسدهم والعياذ بالله


لكن


كنت أحلم يجيني انتداب ..



والحمدلله اليوم كان أول إنتداباتي





تعلمت اليوم :




’’ أن الأحلام ستحقق فقط إحلم ... وأن الكلام بحكمة يفتح لك أبواب الوزارة ’’




**

من أول انتداباتي : بقايا حب