انا بعمله بعجينة العشر دقايق و بقسمها مجموعتين
المقادير :
المجموعة الاولى :
2 كوب ماء دافئ
2 كوب دقيق
2 ملعقة كبيرة خميرة فورية
2 ملعقة كبيرة لبن بودره
ربع ملعقة صغيرة ملح
ربع كوب سكر
المجموعة التانية :
3 كوب دقيق
نص كوب زيت
الطريقة :
باخد مقادير المجموعة الاولى و اضيفهم كلهم على بعض و اقلبهم كويس و اسيبهم من 10 دقايق لحوالى ربع ساعة هتلاقى حجمها زاد و اتضاعف و هتلاقيها مليانه فقاقيع هوا صغيره ده معناه ان الخميرة شغاله و كويسه و خلى بالك ان المايه تكون دافيه مش بارده و لا سخنه و بعد الربع ساعة ما تعدى تكونى انتى ناخله الدقيق كويس و تضيفيه على الخليط ده و معاه نص كباية الزيت و تعجنى كويس لحد ما تلم معاكى و العجينة تبقى مالسه و ناعمه معاكى و لو لقيتيها لسه بتلزق فى ايديكى زودى دقيق لحد ما تظبط معاكى و سيبيها فى الطبق و غطيها و بصى عليها بعد تلت ساعه او نص ساعه هتلاقيها ما شاء الله حجمها اتضاعف معاكى و ابدأى بقى قطعى و اشتغلى فيها براحتك و احشيها زى ما انتى عاوزه انا حطيت فيها جبنه بيضه عادبه و جبنه حادقه و رومى و شوكلاته و رصيهم فى الصاج او الصينية و ادهنى وشهم بيضه و 3 معالق لبن و رشه نسكافيه متدوب فى اللبن و حطى على الوش سمسم و حبة البركة و سويهم فى الفرن على نار متوسطه وبألف هنا و شفا و انا اتبقت معايا حتة عجين روحت عملاها رغيف الفينو ده
أحلى و اطعم و انضف من بتاع بره على الأقل مضمون