منتديات كلك غلا - أضرب على قوقل وعطني علومـه

من اروع قصائد الشاعر سلطان الهاجري

أضرب على قوقل وعطني علومـه
مالـك ومـال مجمعيـن الكلامـي

واليا غدى لأسما الرياجيل حومـه
فالمعمعه مثل الجـراد التهامـي

أحدن يبيع رخيص وأحدن يسومه
تحصل أسمي مع كبـار الأسامـي

بشعر اليا مـر الخشـوم معرومـه
يطيح من عوج الخشـوم العرامـي

وقـل للمغفـل لا يواصـل هجومـه
ترى نضامه يختلف عـن نضامـي

ما بيني وبينـه نقـاش وخصومـه
مخاصم الجهـال عيـب وحرامـي

لعـل جسمـه يسترنـه هـدومـه
ويجوز عن طرد الهوى والغرامي

شعره يغذيـه التـرف والنعومـه
أرهف من النسمه وريش النعامي

وشعري بحر ما كل رجـل يعومـه
أنشد خلف وأنشد رشيد الزلامـي

قل منهو الي مـا تثنـى عزومـه
اليا أحتمى الميقاف والشعر حامي

مثل السحاب الي تـرادم غيومـه
من يحتمي دوره عـداه الملامـي

في موقف محـدن يخلـي لزومـه
كلـن تلفـت للفشـق والحزامـي

أحدن تفاخر بـه ربوعـه وقومـه
وأحدن مع الزحمه عليه السلامـي

هـذي رسالـه مبهمـه ومختومـه
مـع جزيـل الشكـر والاحترامـي